طلبہ سے خطاب

عمل کی قوت پنہاں کو آشکار کرو

وطن کو اوج ترقی سے ہمکنار کرو

سکوں شکن تو بنو سکوں پرست نہیں

ہمیشہ بروئے موج بے قرار کرو

وطن کی ناؤ کے تو ہم ہی تو ناخدا ٹھہرے

وطن کی ناؤ کو ساحل سے ہمکنار کرو

اداس کیوں ہو زمانہ جو سازگار نہیں

اٹھو مزاج زمانہ کو سازگار کرو

فضا میں چھوڑ دو اک نغمۂ سکوت شکن

خود اشک بار ہو اوروں کو اشک بار کرو

مٹا دو باغ جہاں سے فسردگی کا نشاں

ملے جو قطرۂ شبنم اسے شرار کرو

تمہارا آئینۂ دل ہے کچھ غبار آلود

تم اپنے آئینۂ دل کو تابدار کرو

بتاؤ اہل جہاں کو معانیٔ غم عشق

ہر اک دل کو غم یہ دے کے سوگوار کرو

تم اپنے داغ محبت کو خوب چمکا کے

شعاع مہر درخشاں کو شرمسار کرو

تمہاری شان کے شایاں نہیں ہے یہ تقلید

تم اپنی قوت تجرید آشکار کرو

نفس نفس میں جلا چراغ روح یقیں

قبائے فکر پریشاں کو تار تار کرو

بڑھو بڑھو سوئے منزل یقین و عزم کے ساتھ

جو سنگ راہ میں آئے تو سنگسار کرو

جہاں میں رہنے نہ پائے نشان پستی کا

ہر اک ذریعے کو خورشید زر نگار کرو

یہ زندگی تو عبارت ہے سعئ پیہم سے

ذرا مشاہدۂ نبض آبشار کرو

قرار موت ہے انساں کی خودی کے لیے

پیام برقؔ یہ ہے خود کو بے قرار کرو