ساقیا دور انقلابی ہے

ساقیا دور انقلابی ہے

خون دل سے بھری گلابی ہے

بزم پیشینیاں ہوئی برہم

عبرت انگیز اب ساغر جم

طوس و گنجہ ہو یا کہ نیشابور

اب نہیں ہے کہیں سرائے سرور

دہلی اور لکھنؤ نہیں ٹکسال

اکبرآباد کا ہے ابتر حال

اجڑی بستی ہے اب عظیم آباد

دل ناشاد میں گھٹی فریاد

اب عرب کی زباں بھی وہ نہیں

ان کا طرز بیاں بھی وہ نہیں

اہل ایراں کی فارسی وہ کہاں

ہاتھ کنگن کو آرسی وہ کہاں

پھر بھی محفوظ ہے زبان کتاب

نہیں حافظؔ کے ہم نوا کم یاب

ہم زباں سعدیؔ و افغانیؔ کے

ہم پیالہ ہیں اصفہانیؔ کے

قدر دان کمال اسماعیل

ابو طالب کلیمؔ کے بھی مثیل

ان میں سر آمد سخن غالبؔ

بعد خسروؔ ز اہل فن غالبؔ