mere bichhDe hue hamdam mere derina habib

mere bichhḌe hue hamdam mere derīna habīb

merā har ḳhvāb hai lab-tishna-e-ta.amīr ai dost

merī goyā.ī hai be-jāñ sī tahrīr ai dost

ajnabiyyat nazar aatī hai mujhe rāhoñ meñ

kitnā maġhmūm sā rahtā huuñ safar-gāhoñ meñ

jalva-gāhoñ se guzartā huuñ be-ma.anī

ba-har-andāz sañvartā huuñ magar be-ma.anī

na ḳhayāloñ meñ tasalsul na irādoñ meñ sabāt

tū ne kyuuñ chhīn lī mujh se mirī zanjīr-e-hayāt

terī pur-josh rifāqat hai sar-e-zehn-e-nadīm

mere gītoñ meñ samoyā hai terā lahn-e-nadīm

ham ki bichhḌe na kabhī arsa-e-bachpan se nadīm

do alag rāhoñ meñ kyuuñ aaj ye āvāra haiñ

kuchh nahīñ puḳhtagī shauq meñ nākāra haiñ

merī majbūrī jise tū ne irāda samjhā

merī kamzorī-e-fitrat kā i.aada samjhā

vaqt ne baḌh ke dil-e-sāf ko be-nūr kiyā

aur yuuñ tujh ko rifāqat se mirī duur kiyā

ham ki bichhḌe na kabhī arsa-e-bachan se nadīm

do alag rāhoñ meñ kyuuñ aaj ye āvāra haiñ

kuchh nahīñ puḳhtagī shauq meñ nākāra haiñ

mere bichhDe hue hamdam mere derina habib

mera har KHwab hai lab-tishna-e-tamir ai dost

meri goyai hai be-jaan si tahrir ai dost

ajnabiyyat nazar aati hai mujhe rahon mein

kitna maghmum sa rahta hun safar-gahon mein

jalwa-gahon se guzarta hun be-mani

ba-har-andaz sanwarta hun magar be-mani

na KHayalon mein tasalsul na iradon mein sabaat

tu ne kyun chhin li mujh se meri zanjir-e-hayat

teri pur-josh rifaqat hai sar-e-zehn-e-nadim

mere giton mein samoya hai tera lahn-e-nadim

hum ki bichhDe na kabhi arsa-e-bachpan se nadim

do alag rahon mein kyun aaj ye aawara hain

kuchh nahin puKHtagi shauq mein nakara hain

meri majburi jise tu ne irada samjha

meri kamzori-e-fitrat ka iada samjha

waqt ne baDh ke dil-e-saf ko be-nur kiya

aur yun tujh ko rifaqat se meri dur kiya

hum ki bichhDe na kabhi arsa-e-bachan se nadim

do alag rahon mein kyun aaj ye aawara hain

kuchh nahin puKHtagi shauq mein nakara hain