بابا گرو نانک

آشنائے راز وحدت کاشف سر خفی

دولت عرفاں بعنوان دگر تجھ کو ملی

راحت قلب و جگر محراب جاں کے پیش امام

نیک فطرت نیک صورت نیک خصلت نیک نام

دردمندوں کے مسیحا بیکسوں کے چارہ گر

شام کی تاریکیوں میں جلوۂ نور سحر

قافلۂ سالار ملت نا خدائے ملک و قوم

خضر منزل رہبر دانا عصائے ملک و قوم

سر پہ دستار فضیلت رخ پہ نور کائنات

واقعی صد لائق تعظیم ہے تیری حیات

لفظ الفت کی مکمل شرح اک تیرا وجود

عاشقی میں توڑ ڈالیں ظاہری ساری قیود

تھا توکل اور استغنا شعار زندگی

بھوک کی شدت میں اک دانے کی بھی خواہش نہ کی

تیرے قدموں پہ شہنشاہوں کی پیشانی جھکی

الغرض ہستی تری صد لائق تحسین تھی

پیشوا رہبر گرو درویش عامل اور فقیر

تجھ کو حاصل تھے یہ رتبے اے امیروں کے امیر

ہیں عمل پیرا تری تعلیم پر اہل تمیز

اس لیے ہیں آج بھی دنیا میں وہ ہر دل عزیزؔ