وہ رسول_ختمی مرتبت کوئی ان_سا رتبہ_رسا نہیں

وہ رسول ختمی مرتبت کوئی ان سا رتبہ رسا نہیں

وہ خدا نہیں بخدا مگر وہ خدا سے اپنے جدا نہیں

وہ بشر بھی ہیں وہی نور بھی ہے انہی سے سب کا ظہور بھی

جو بشر کہیں تو خطا نہیں کوئی ہم سا کہہ دے روا نہیں

وہ علیم غیب و خبر ہیں وہی شان رب قدیر ہیں

ہیں یہ رب کی ان پہ عنایتیں کوئی شک بھی اس میں ذرا نہیں

وہ تمام جلوۂ ذات حق وہ صفات رب کمال ہیں

کسے ہمسری کی مجال ہے کوئی ہمسر ان کا ہوا نہیں

جو نبی کہیں وہ خدا کرے یہ عجیب شان حبیب ہے

ہو قضا کا تیر بھی بے اثر جو کماں سے ان کے چلا نہیں

وہ کبھی ملک وہ کبھی بشر وہ کبھی ہیں دونوں سے ماروا

وہ عیاں بھی ہیں وہ نہاں بھی ہیں یہ حقیقت ان کی پتا نہیں

وہ دوام ذات حبیب ہے کہ فنا کا اس میں گزر نہیں

جو فنائے عشق حبیب ہے تو بقا ہے اس کو فنا نہیں

جو ادب کی حد سے گزر گیا نہیں درین اس کے نصیب میں

یہ وہ فضل خاص کریم ہے کسی بے ادب کو ملا نہیں

وہی کم نظر وہی در بدر وہی دین حق سے ہے دور تر

جو نبی کے رتبے سے بے خبر جو در نبی پہ جھکا نہیں

یہ کرم حضور ہے آپ کا کہ گزر رہی ہے یہ زندگی

ذرا غمزدوں پہ نظر رہے کوئی غم بھی ہم سے جدا نہیں

یہ ہلالؔ کشتۂ عشق ہے یہ قتیل ہجر و فراق ہے

وہ حبیب اس کے طبیب ہیں کہیں اور اس کی شفا نہیں