حسنین کی، حسنین کے آثار کی جے ہو

حسنین کی، حسنین کے آثار کی جے ہو

جے سورگ کے مہراج کی، سردار کی جے ہو

قربان ہوئے آپ جو اسلام کی خاطر

شبیرِ وفادار کی، خوددار کی جے ہو

ہیں پشت پہ حسنین تو سجدے میں نبی ہیں

نانا کے اسی لاڈ کی اور پیار کی جے ہو

کربل میں کٹا سر جو وہی سر ہے فتحیاب

اس سر کے ہر اک موئے وفادار کی جے ہو

جنت کے دروغہ نے بھی یہ نعرہ لگایا

جنت کے جواں لوگوں کے سردار کی جے ہو

جس نے کہ درِ خیبرِ صہیون اکھاڑا

دامادِ نبی حیدر کرار کی جے ہو

مولیٰ کا دھنے واد ہو زہرا کی ہو مدحت

یعنی کہ ہر اک صاحبِ اطہار کی جے ہو

آتا ہے محرم تو چھلک جاتے ہیں آنسو

شبیر کی، شبیر کے غم خوار کی جے ہو

لعنت ہو یزیدی پہ کہ لعنت کے ہیں حقدار

اصحابِ حسینی کی، عزادار کی جے ہو

اشعار میں حسنین کی جے کار لکھی ہے

شایانؔ کی، شایان کے اشعار کی جے ہو