اپنی غربت سے تری شان سے ڈر لگتا ہے

اپنی غربت سے تری شان سے ڈر لگتا ہے

آپ سے حسن کے سلطان سے ڈر لگتا ہے

جی تو چاہتا ہے ترے عشق کو افشا کر دوں

تیری عزت سے تری آن سے ڈر لگتا ہے

دیدہ دانستہ جو انجان بنا بیٹھا ہو

ایسے نادان سے انجان سے ڈر لگتا ہے

راہ رو راہ محبت کا خدا حافظ ہو

اس خطرناک بیابان سے ڈر لگتا ہے

رنگ بدلے گی یہ فرقت میں نہ جانے کیا کیا

اے خدا اب مجھے اس جان سے ڈر لگتا ہے

پھر نہ پھر جائے کہیں مجھ سے عنایت کی نظر

اس نئے عہد سے پیمان سے ڈر لگتا ہے

دفعتاً اس نے جو روکا ہے جفاؤں سے ہاتھ

ہائے اس زود پشیمان سے ڈر لگتا ہے

قہر کی مجھ پہ نظر ہو کہ عنایت کی نظر

اس بت شوخ کی ہر شان سے ڈر لگتا ہے

وہ تو مائل بہ کرم ہو ہی گئے ہیں لیکن

مجھ کو بدلے ہوئے نادان سے ڈر لگتا ہے

نام سنتے ہی مرا مجھ سے لپٹ کر بولے

مجھ کو اس حشر بدامان سے ڈر لگتا ہے

اے محبت کے پرستار سنبھل کر چلنا

راہ الفت میں ہر اک آن سے ڈر لگتا ہے

کس قدر پاس ہے رسوائی کا اپنی ان کو

راہ میں ملنے سے پہچان سے ڈر لگتا ہے

توڑتے ہیں وہ مرا دل یہ سنا کر مجھ کو

مجھ کو دو روز کے مہمان سے ڈر لگتا ہے

بات اتنی سی تھی پہنچی کہاں تک یا رب

ایسے بڑھتے ہوئے طوفان سے ڈر لگتا ہے

اس کی رحمت کی کوئی حد ہی نہیں ہے مشتاقؔ

اپنی ہی تنگئ دامان سے ڈر لگتا ہے