بزم دل میں ہمیں روشنی کے لیے اب کوئی حسن والا نہیں چاہیے

بزم دل میں ہمیں روشنی کے لیے اب کوئی حسن والا نہیں چاہیے

جس دیے میں جلے تیل خیرات کا اس دیے کا اجالا نہیں چاہیے

سونے چاندی کے لقمے مبارک تمہیں جو کی اک خشک روٹی بہت ہے مجھے

زہر بن جائے جو زندگی کے لیے مجھ کو ایسا نوالا نہیں چاہیے

غیرت عشق بھی تو کوئی چیز ہے میرا کاسہ ہے خالی تو خالی رہے

جو مدد دے کے خودداریاں چھین لے اس طرح دینے والا نہیں چاہیے

میرے فن سے ملے کچھ تو لے لو ظفرؔ مجھ کو رہنے دو گمنامیوں میں مگر

سستی شہرت کی مجھ کو ضرورت نہیں نام کا بول بالا نہیں چاہیے