اثر سوز تمنا کا جو کامل ہوتا جاتا ہے

اثر سوز تمنا کا جو کامل ہوتا جاتا ہے

نگاہ لطف کا مرکز مرا دل ہوتا جاتا ہے

مری وارفتگی گم گشتگی بڑھتی رہی یارب

کہ اب دل آشنائے راہ منزل ہوتا جاتا ہے

بڑھاتا جا رہا ہوں رفتہ رفتہ حسن بیتابی

دل محزوں تری نظروں کے قابل ہوتا جاتا ہے

اداؤں سے نگاہوں سے خموشی سے تکلم سے

حصول آرزو منزل بہ منزل ہوتا جاتا ہے

وہ جتنے مجھ سے برہم اور برہم ہوتے جاتے ہیں

مرا دل اور مائل اور مائل ہوتا جاتا ہے

نگاہ ناز جاناں بے نیاز دل سہی واصفؔ

مگر حب تمنا رنگ محفل ہوتا جاتا ہے