asar soz-e-tamanna ka jo kaamil hota jata hai

asar soz-e-tamannā kā jo kāmil hotā jaatā hai

nigāh-e-lutf kā markaz mirā dil hotā jaatā hai

mirī vāraftagī gum-gashtagī baḌhtī rahī yā-rab

ki ab dil āshnā-e-rāh-e-manzil hotā jaatā hai

baḌhātā jā rahā huuñ rafta-rafta husn-e-betābī

dil-e-mahzūñ tirī nazroñ ke qābil hotā jaatā hai

adāoñ se nigāhoñ se ḳhamoshī se takallum se

husūl-e-ārzū manzil ba-manzil hotā jaatā hai

vo jitne mujh se braham aur braham hote jaate haiñ

mirā dil aur maa.il aur maa.il hotā jaatā hai

nigāh-e-nāz-e-jānāñ be-niyāz-e-dil sahī 'vāsif'

magar hubb-e-tamannā rañg-e-mahfil hotā jaatā hai

asar soz-e-tamanna ka jo kaamil hota jata hai

nigah-e-lutf ka markaz mera dil hota jata hai

meri waraftagi gum-gashtagi baDhti rahi ya-rab

ki ab dil aashna-e-rah-e-manzil hota jata hai

baDhata ja raha hun rafta-rafta husn-e-betabi

dil-e-mahzun teri nazron ke qabil hota jata hai

adaon se nigahon se KHamoshi se takallum se

husul-e-arzu manzil ba-manzil hota jata hai

wo jitne mujh se braham aur braham hote jate hain

mera dil aur mail aur mail hota jata hai

nigah-e-naz-e-jaanan be-niyaz-e-dil sahi 'wasif'

magar hubb-e-tamanna rang-e-mahfil hota jata hai