فنا کوئی کوئی بقا چاہتا ہے

فنا کوئی کوئی بقا چاہتا ہے

مرا دل مرا دل ربا چاہتا ہے

جو دشمن برا چاہے میرا تو کیا ہو

وہ ہوتا ہے جو کچھ خدا چاہتا ہے

تو ہے کارساز اور بنائے سے تیرے

مرا کام بگڑا بنا چاہتا ہے

بس اب بلبلیں چہچہائیں گی ہر سو

کہ گلشن میں ہر گل کھلا چاہتا ہے

میرا دل تصور میں اس شمع رو کے

پتنگے کی صورت جلا چاہتا ہے

انا لیلیٰ نکلے گا ہر موئے تن سے

کہ اب قیس لیلیٰ بنا چاہتا ہے

دلا موت آنے سے پہلے ہی مر جا

اگر زندگی کا مزا چاہتا ہے

خیالوں میں نظروں میں دل میں ہے دلبر

حفیظؔ اب بھلا اور کیا چاہتا ہے