ہاں میسر جو طواف در جاناں ہو جائے

ہاں میسر جو طواف در جاناں ہو جائے

صرف فریاد میں کیوں عمر گریزاں ہو جائے

اس میں بس جائے اگر روئے محمد کی بہار

رشک صد طور ہمارا دل ویراں ہو جائے

شوق دیدار میں اس نرگس جادو کا شہید

چاہتا ہے ہمہ تن دیدۂ حیراں ہو جائے

جب ہو تم پیش نظر خود ہی بتاؤ کیوں کر

مختصر اب گلۂ تنگیٔ داماں ہو جائے

میں ہوں وہ کشتۂ غم جس کی حیات اے فضلیؔ

پنجۂ موت سے بھی دست و گریباں ہو جائے