کیا شکوہ ہمیں اے دل ہم پر آوازیں جو دنیا کستی ہے

کیا شکوہ ہمیں اے دل ہم پر آوازیں جو دنیا کستی ہے

اب خود ہی ہماری حالت پر تقدیر ہماری ہنستی ہے

اے دوست جفاؤں کی تیری کچھ اس پر نوازش ہے ورنہ

اک قطرۂ خون دل کے سوا کیا اشک وفا کی ہستی ہے

رفعت کے فریبوں میں آ کے تو ناز نہ کر مغرور نہ بن

سمجھا ہے بلندی تونے جسے نادان یہ حد کی پستی ہے

مجبور یونہی مجبور رہا بیتاب کو کب ہے تاب ملی

پہلے بھی یہ دنیا بستی تھی اور اب بھی یہ دنیا بستی ہے

یہ سچ ہے ستم کے ہاتھوں سے آزاد ہوا گلشن لیکن

گلچیں جفا کی شاخوں پر اب بھی وہی چیرہ دستی ہے

ہاں تھا جو ارادوں کا مسکن اور تھا جو امنگوں کا گلشن

یہ دل ہے وہی اب جس دل میں ناکام تمنا بستی ہے

تدبیر کے ناخن سے جتنی ہم کھولتے ہیں گرہیں غم کی

اتنی ہی نیازؔ زار ہمیں تقدیر کی بندش کستی ہے