اس طرح بزمِ پری وش میں ہیں دیوانے چند

اس طرح بزمِ پری وش میں ہیں دیوانے چند

شمع کے چاروں طرف جیسے ہوں پروانے چند

مجھ کو ساقی نے دیئے بھر کے وہ پیمانے چند

جن میں ہر ایک کے پہلو میں تھے میخانے چند

ہوں وہ خوش بخت قدح نوش کہ ہر صبح و مسا

غیب سے مجھ کو اتر آتے ہیں پیمانے چند

گل ہیں گر باغ میں بلبل کو تو ہیں کانٹے بھی

چند اپنے ہیں جو دنیا میں تو بیگانے چند

حسن کا قحط نہیں عشق کی تکمیل ہے سخت

گر حسیں سیکڑوں دیکھو گے تو دیوانے چند

زیست عاشق کی ہے اے شمع فنا میں مضمر

کہتے جاتے تھے دمِ طوف یہ پروانے چند

اے فریدیؔ مرا غواص تخیل لایا

بحرِ جذبات سے نایاب یہ دردانے چند