ہم دل مٹا کے منزل تسکین پا گئے

ہم دل مٹا کے منزل تسکین پا گئے

اب زندگی کو جینے کے انداز آ گئے

بربادیاں وہ شدت احساس دے گئیں

غنچہ بھی کوئی چٹکا تو ہم تلملا گئے

سو راستے طلب کو دکھائے امید نے

جب بھی ہوا گمان کہ منزل پہ آ گئے

دنیا میں کس سے مانگیں نگاہ کرم کی بھیک

ہم سے تو حادثات بھی آنکھیں چرا گئے

احساس‌ بیکسی کی نزاکت پہ اک نظر

پھر ان پہ تبصرہ کہ جو دامن بچا گئے

اکثر ہوا ہے یہ بھی کہ پرسان حال بھی

ہمدردیوں سے درد کی شدت بڑھا گئے

وہ چشم التفات گریزاں بھی ہو گئی

اہل وفا صلہ بھی وفاؤں کا پا گئے

اظہار غم میں دل کا وہ عالم کہ الاماں

جنبش ہوئی زباں کو تو لب تھرتھرا گئے

آنسو کچھ اس طرح سے چھلک آئے اے نیازؔ

ظالم مری نظر سے مجھے بھی گرا گئے