کمر پر اشعار

پر کرامت ہے قبائے سرخ میں تیری کمر

ورنہ مو ثابت نہیں رہتا ہے دلبر آگ میں

وہم ہے شک ہے گماں ہے بال سے باریک ہے

اس سے بہتر اور مضمون کمر ملتا نہیں

نہ کمر اس کی نظر آئے ثابت ہو دہن

گفتگو اس میں عبث اس میں ہے تکرار عبث

نہ تھا شباب کمر میں ریاضؔ زر ہوتا

تو دن بڑھاپے کے بھی نذر لکھنؤ کرتے

مرے قتل کو آئے اس سادگی سے

چھری ہاتھ میں ہے نہ خنجر کمر میں

کیا لگایا یار نے سینے میں ہی تیر نگاہ

قوس کی مانند میرا کج کمر ہونے لگا

خدا حافظ ہے اس گل کی کمر کا

غضب جھونکے چلے باد سحر کے

عدم کی حقیقت کھلےگی تمام

تری زلف جب تا کمر جائےگی

کمر سیدھی کرنے ذرا میکدے میں

عصا ٹیکتے کیا ریاضؔ آ ہے ہیں

دہن ہے چھوٹا کمر ہے پتلی سڈول بازو جمال اچھا

طبیعت اپنی بھی ہے مزے کی پسند اچھی خیال اچھا

ہے باریک تار نظر سے زیادہ

دکھائی نہ دے گی کمر دیکھ لینا