انتظار پر اشعار

اجالا ہو تو ڈھونڈوں دل بھی پروانوں کی لاشوں میں

مری بربادیوں کو انتظار صبح محفل ہے

خلوت انتظار میں اس کی

در و دیوار کا تماشا ہے

انتظار قاصد گم گشتہ نے مارا نصیرؔ

کس طرح اڑ جائیے کوچے میں اس کے پر لگا

حاضر ہے بزم یار میں سامان عیش سب

اب کس کا انتظار ہے اکبرؔ کہاں ہو تم

نہ آیا کیا سبب اب الگ رہا دل انتظار آخر

جہاں ہووے وہاں جا کر مجھنے ہونا نثار آخر

مے سے چلو بھر دے ساقی جام کا کیا انتظار

ابر آیا جھوم کر موقع نہیں تاخیر کا

کہاں ممکن ہے کس سے انتظار یار ہو مجھ سا

رہے گی پھر بھی یوں ہی مثل نرگس آنکھ وا کس کی

الٰہی رنگ یہ کب تک رہے گا ہجر جاناں میں

کہ روز بے دلی گزرا تو شام انتظار آئی

جا کہے کوئے یار میں کوئی

مر گیا انتظار میں کوئی

دن انتظار کا تو کٹا جس طرح کٹا

لیکن کسو طرح نہ کٹی رات رہ گئی

اے قیامت آ بھی تیرا ہو رہا ہے انتظار

ان کے در پر لاش اک رکھی ہے کفنائی ہوئی

جب نگاہیں اٹھ گئیں اللہ ری معراج شوق

دیکھتا کیا ہوں وہ جان انتظار آ ہی گیا

تیرے وعدوں کا اعتبار کسے

گو کہ ہو تاب انتظار کسے

یہ حال کھلا نہ کچھ بھی عرفاںؔ

ہے تجھ کو یہ انتظار کس کا

کر قتل شوق سے میں تصدق ہوا ہوا

سرکار نہیں ہے فکر جو ہوا انتظار خاص

قیامت آ چکی دیدار حق ہوا سب کو

ہم اب تلک بھی ترا انتظار رکھتے ہیں

نہ رہا انتظار بھی اے یاس

ہم امید وصال رکھتے تھے

نہ آئیں گے وہ حسرتؔ انتظار شوق میں یو نہیں

گزر جائیں گے ایام بہار آہستہ آہستہ

مٹنے کا غم نہیں ہے بس اتنا ملال ہی

کیوں تیرا انتظار کیا ہائے کیا کیا

دکھائیے آج روئے زیبا اٹھائیے درمیاں سے پردہ

کہاں سے اب انتظار فردا یہی تو سنتے ہیں عمر بھر سے

جب وہ آتے نہیں شب وعدہ

موت کا انتظار ہوتا ہے

اکثر پلٹ گئی ہے شب انتطار موت

مرنے نہ درد دل نے دیا تا سحر مجھے

ایک دن ایسا بھی ہوگا انتظار یار میں

نیند آ جائے گی دروازہ کھلا رہ جائے گا

جل ہی گیا فراق تو آتش سے ہجر کی

آنکھوں میں مری رہ نہ سکا یارو انتظار

دیکھو کوئے یار میں مت حضرت دل راہ اشک

انتظار قافلہ منزل پہ کیوں کھینچے ہیں آپ

کثرت امید بھی عیش آفریں ہونے لگی

انتظار یار بھی راحت فزا ہونے لگا

آ کر وہ میری لاش پہ یہ کہہ کے رو دیے

تم سے ہوا نہ آج مرا انتظار بھی

وصل کا انتظار ہی اچھا

یہ تو مضطرؔ خدا کرے کہ نہ ہو

جب نگاہیں اٹھ گئیں اللہ ری معراج شوق

دیکھتا کیا ہوں وہ جان انتظار آ ہی گیا

آ جائیو یار گھر سے جلدی

مت کشتۂ انتظار کیجو