گل پر اشعار

باغ جہاں کے گل ہیں یا خار ہیں تو ہم ہیں

گر یار ہیں تو ہم ہیں اغیار ہیں تو ہم ہیں

صورت گل میں کھلکھلا کے ہنسا

شکل بلبل میں چہچہا دیکھا

رنگ گل پھیکا ہے جس کے سامنے

اتنا رنگیں یار کا رخسار ہے

میں وہ گل ہوں نہ فرصت دی خزاں نے جس کو ہنسنے کی

چراغ قبر بھی جل کر نہ اپنا گل فشاں ہوگا

جان جاتی ہے چلی دیکھ کے یہ موسم گل

ہجر و فرقت کا مری جان یہ گلفام نہیں

سنبھل جاؤ چمن والو خطر ہے ہم نہ کہتے تھے

جمال گل کے پردے میں شرر ہے ہم نہ کہتے تھے

گل کا کیا جو چاک‌ گریباں بہار نے

دست جنوں لگے مرے کپڑے اتارنے

بلبل کو مبارک ہو ہوائے گل و گلشن

پروانے کو سوز دل پروانہ مبارک

جان دی بلبلوں نے جب گل پر

تب وہ گلزار میں نظر آیا

وہ فصل گل میں دل کو جلا کر چلے گئے

اس مرتبہ تو آگ لگا دی بہار نے

سارے عالم میں تیری خوشبو ہے

اے میرے رشک گل کہاں تو ہے

گل رویوں کے خیال نے گلشن بنا دیا

سینہ کبھی مدینہ کبھی کربلا ہوا

کچھ ایسا درد شور قلب بلبل سے نکل آیا

کہ وہ خود رنگ بن کر چہرۂ گل سے نکل آیا

نے گل کو ہے ثبات نہ ہم کو ہے اعتبار

کس بات پر چمن ہوس رنگ و بو کریں

شیداۓ روگل نہ ہیں شیداۓ قدسرو

صیاد کے شکار ہیں اس بوستاں میں ہم

فصل گل آئی یا اجل آئی کیوں در زنداں کھلتا ہے

یا کوئی وحشی اور آ پہنچا یا کوئی قیدی چھوٹ گیا

کیا سیر سب ہم نے گلزار دنیا

گل دوستی میں عجب رنگ و بو ہے

آسیؔ گریاں ملا محبوب سے

گل سے شبنم جس طرح رو کر ملے

ہمیں تو باغ تجھ بن خانۂ ماتم نظر آیا

ادھر گل پھاڑتے تھے جیب روتی تھی ادھر شبنم

منتظر ہے آپکے جلوہ کی نرگس باغ میں

گل گریباں چاک شبنم اک طرف نم دیدہ ہے

کسی کا ساتھ سونا یاد آتا ہے تو روتا ہوں

مرے اشکوں کی شدت سے سدا گل تکیہ گلتا ہے

سمجھ کر سانپ اس کو وہ گلے سے میرے آ لپٹا

جو شب بستر پہ دیکھا گل بدن نے ہار کا سایا

مرے گل کو لا یہ اپنے پھول لے جا عندلیب

ایسے کانٹوں سے نہیں پھانسیں نکلوانی مجھے

ہر گل ہے چاک دامن ہر غنچہ دل گرفتہ

اے باغبان قدرت فصل بہار کیا ہے

کوئی اس کا ہو گریباں گیر یہ کہتا نہیں

باغباں دامان گل کو گل پہ کیوں کھینچے ہیں آپ

شاخ گل ہلتی نہیں یہ بلبلوں کو باغ میں

ہاتھ اپنے کے اشارے سے بلاتی ہے بہار

کوئی تبصرہ بھی کرے تو کیا ترے پرخلوص شعار پر

جو نصیب گل ہے ترا کرم تو نگاہ لطف ہے خار پر

دیکھتے تھے تختۂ گل ہائے آتش کی بہار

جس طرح یارو خلیل اللہ پیمبر آگ میں

صبا کی طرح رہا میں بھی کو بہ کو پھرتا

ہمارے دل سے بھی اس گل کی جستجو نہ گئی

کیوں نہ رشک آئے گل سرخ پہ شبنم کو دیکھ

کہ میرا اشک تیری کان کا گوہر نہ ہوا

ترا وجود ہے جان بہار گلشن چشت

تجھی سے نکہت ہر گل ہے یا غریب نواز

اس گل رعنا نے ہنس کر بات کی

غنچۂ خاطر ہمارا کھل گیا

کہاں دامن حسن عاشق سے اٹکا

گل داغ الفت میں کانٹا نہیں ہے

عشق میں تیرے گل کھا کر جان اپنی دی ہے نصیرؔ نے آہ

اس کے سر مرقد پر گل رولا کوئی دونا پھولوں کا

یاد میں اس قد و رخسار کے اے غم زدگاں

جا کے ٹک باغ میں سیر گل و شمشاد کرو

کس طرح حال دل کہوں اس گل سے باغ میں

پھرتی ہے اس کے ساتھ تو ہر دم صبا لگی

لالہ و گل سے تجھ کو کیا نسبت

نا مکمل سے استعارے ہیں

خدا حافظ ہے اس گل کی کمر کا

غضب جھونکے چلے باد سحر کے

ہنسی عبرت بہت جب رنگ گل کی بے ثباتی نے

چمن میں عندلیب سادہ‌ دل کو شادماں پایا

نالے بلبل نے گو ہزار کیے

ایک بھی گل نے پر سنا ہی نہیں

گل مرقع ہیں ترے چاک گریبانوں کے

شکل معشوق کی انداز ہیں دیوانوں کے

کر گریباں چاک‌ اپنا گل نمط بہیں پر گرا

درد دل بلبل سوں سن کر او گل خنداں مرا

اس موسم گل ہی سے بہکے نہیں دیوانے

ساتھ ابر بہاراں کے وہ زلف بھی لہرائی

نہ ہوں پروانۂ ہر شمع بیدارؔ

فدائے سرو گل اندام ہوں میں

کیا مہ و مہر کیا گل و لالہ

جب میں دیکھا تو جلوہ گر تو ہے

مرا جی جلتا ہے اس بلبل بیکس کی غربت پر

کہ جن نے آسرے پر گل کے چھوڑا آشیاں اپنا

مرتا ہوں میرزائی گل دیکھ ہر سحر

سورج کے ہاتھ چونری تو پنکھا صبا کے ہاتھ

ناز گل کا شہید ہے جو فناؔ

قبر پر گل رخوں کا میلہ ہے

بو گل سے مجھے دھوکہ نہ دے اس کی بو کا

چوچلا رہنے دے بعد سحری تو اپنا

ابھی تو لگ نہ چلنا تھا اثرؔ اس گل بدن کے ساتھ

کوئی دن دیکھنا تھا زخم دل بے طرح آلا تھا