اندھیرا پر اشعار

چاروں سمت اندھیرا پھیلا ایسے میں کیا رستہ سوجھے

پربت سر پر ٹوٹ رہے ہیں پاؤں میں دریا بہتا ہے

اٹھ کے اندھیری راتوں میں ہم تجھ کو پکارا کرتے ہیں

ہر چیز سے نفرت ہم کو ہوئی ہم جنت فردا بھول گئے

میں اندھیری گور ہوں اور تو تجلی طور کی

روشنی دے جا چراغ روئے جانانہ مجھے

اک راز ہے اے مضطرؔ تربت کا اندھیرا بھی

آئی ہے پئے ماتم کعبے کی سیہ پوشی

جیون کی الجھی راہوں میں جب گھور اندھیرا آتا ہے

ہاتھوں میں لئے روشن مشعل تو گرو ہمارے ملتے ہیں

اس پاپ کی نگری میں ہر اور اندھیرا ہے

اجیار میں بس وہ ہے جو تجھ کو پیا چاہے

شب دیجور اندھیرے میں ہے بادل کے نہاں

لیلیٰ محمل میں ہے ڈالے ہوئے منہ پر آنچل

جا کو کوئی پکڑے تو کیسے کام کرت ہے نظر نہ آئے

چپکے چپکے سیندھ لگاوے دن ہووے یا اندھیری رتیاں

تم اپنی زلف کھولو پھر دل پر داغ چمکے گا

اندھیرا ہو تو کچھ کچھ شمع کی آنکھوں میں نور آئے

نکل کر زلف سے پہنچوں گا کیونکر مصحف رخ پر

اکیلا ہوں اندھیری رات ہے اور دور منزل ہے

بڑے خلوص سے مانگی تھی روشنی کی دعا

بڑھا کچھ اور اندھیرا چراغ جلنے سے

آنکھ روشن ہو تو دنیا کے اندھیرے کیا ہیں

رستہ مہتاب کو راتوں کی سیاہی میں ملا

سر زمین شام میں تارا گرا ہے ٹوٹ کر

یا اندھیری رات میں جگنو چمک کر رہ گیا

یہ رات کیوں نہ ہو افضل تمام راتوں میں

لیے ہوئے ہیں اندھیرے چراغ ہاتھوں میں

دھواں آہوں کا اپنی رنگ لایا

اندھیرا ہو گیا ہے آسماں پر

تم آئے روشنی پھیلی ہوا دن کھل گئیں آنکھیں

اندھیرا سا اندھیرا چھا رہا تھا بزم امکاں میں

یہ اندھیرا پہلے سورج کو چرا لے جائے گا

پھر زمانے سے اجالوں کو اٹھا لے جائے گا