شاہ_بطحا اور ان کے ہم_نشینوں پر سلام

شاہ بطحا اور ان کے ہم نشینوں پر سلام

جنت الفردوس کے سارے مکینوں پر سلام

سورۂ والشمس جن کی خوش نما تفسیر ہے

ان حسیں چہروں پہ ان روشن جبینوں پر سلام

آج بھی روشن ہے جن کی زندگی کا آفتاب

بھیج اے دل ان محبت کے امینوں پر سلام

عشق میں ڈوبی ہوئی مخمور نظروں پر درود

شوق میں کھوئے ہوئے پر نور سینوں پر سلام

آج بھی جن سے چھلکتی ہے شراب معرفت

بادۂ توحید کے ان آبگینوں پر سلام

لے اڑی تھی جن کی تھوڑی سی جھلک صبح ازل

معدن خوبی کے ان دل کش نگینوں پر سلام

جن سے شرمندہ ہیں نظریں کوثر و تسنیم کی

باخلوص ان پاک سیرت پاک بینوں پر سلام

جگمگاتے ہیں جو زیر خاک باصد آب و تاب

ان دفینوں پر درود اور ان خزینوں پر سلام

جن سے چھنتی رہتی ہے اب تک شعاعیں نور کی

سینۂ گیتی کے ان نوری دفینوں پر سلام

جن کا سونا بھی عبادت جاگنا بھی بندگی

ان جہاں‌ افروز ان خلوت گزینوں پر سلام

اب بھی ہیں معصوم جلوے بن کے پیغام حیات

سیدہ کی گود کے ان نازنینوں پر سلام

اب بھی ہیں معراج جن کے نقش پا نقش عمل

بھیجتے ہیں اہل دل ان مہ جبینوں پر سلام