वहीदुद्दीन ख़ाँ के सूफ़ी उद्धरण
اگر آپ اپنی آرزؤوں کا محل چھت کی طرف سے کھڑا کرنا چاہیں تو آخر کار آپ کے حصہ میں ملبہ کے سوا اور کچھ نہ آئے گا۔
الفاظ کا تاج محل خواہ کتنا ہی حسین ہو، حقائق کا طوفان اس کو اِس طرح بہا لے جاتا ہے جس طرح کوئی آندھی تنکوں کے ڈھیر کو۔
راستہ صرف اس آدمی کے لیے بند ہے جس کو راستہ چلنا نہ آتا ہو، ہوا کے لطیف جھونکے ہر روز یہ پیغام دے رہے ہیں۔
کرنے والے ہمیشہ اپنا کام آج کے دن کرتے ہیں اور نہ کرنے والے ہمیشہ اپنا کام کل کے دن۔
کوئی بھی چیز سورج کو جلد طلوع نہیں کرسکتی مگر ہر آدمی یہ چاہتا ہے کہ وہ اپنی زندگی کی صبح کو جلد پیدا کر لے۔
اکثر لوگ زندگی کی کتاب پڑھنا شروع کر دیتے ہیں بغیر اس کے کہ انہوں نے زندگی کی زبان سیکھی ہو۔
منزل پر پہنچنا صرف اس شخص کے لیے مقدر ہے جو راستہ کے کانٹوں سے بچ کر آگے نکل جائے۔
آدمی پھول بن کر مہکے اور آفتاب بن کر چمکے دنیا خاموش زبان میں ہر روز یہ پیغام دے رہی ہے۔
تمام کامیابیوں کا سب سے بڑا راز صبر ہے اور تمام ناکامیوں کا سب سے بڑا راز بے صبری۔
نادان نے کہا کہ میں نے اپنے ماضی اور حال کو برباد کر دیا، دانش مند بولا مگر مستقبل تو برباد نہیں ہوا۔
اس دنیا میں کوئی غروب آخری نہیں، ہر غروب کے لیے ایک نیا طلوع مقدر ہے، بشرطیکہ آدمی اپنی شام کو دوبارہ صبح میں تبدیل کرنے کا حوصلہ رکھتا ہو۔
دانش مند وہ ہے جس کا حریف اس کے منصوبہ سے اس وقت باخبر ہو جب کہ وہ اپنے منصوبہ کو تکمیل تک پہنچا چکا ہو۔
عقل مند آدمی ہر چیز کی امید اپنے آپ سے کرتا ہے اور بے وقوف آدمی ہر چیز کی امید دوسروں سے۔
عقل مند انسان وہ ہے جو اپنے حق سے کم لینے پر راضی ہو جائے اور دوسروں کو ان کے حق سے زیادہ دینے کے لیے تیار رہے۔
اگر آپ نے اپنے آغاز کو پالیا تو آپ اپنے اختتام کو بھی پاسکتے ہیں کیوں کہ صحیح آغاز ہی کا دوسرا نام صحیح اختتام ہے۔
آج کا ڈوبا ہوا سورج اگلے دن ضرور طلوع ہوتا ہے مگر اکثر لوگ آنے والے دن تک اس کا انتظار نہیں کرتے۔
ترقی کا زینہ آدمی کی اپنی محنت ہے مگر بہت سے لوگ دوسروں کی بربادی کو اپنی ترقی کا سب سے قریبی زینہ سمجھ لیتے ہیں۔
کوئی شخص کسی دوسرے کے لیے نہیں لڑتا ہر آدمی کو اپنی زندگی کی لڑائی خود لڑنی پڑتی ہے۔
آدمی اگر دوسروں کی غلطیوں سے سبق لینا سیکھ لے تو کبھی وہ اپنے معاملات میں غلطی نہ کرے۔
بلند مقام ہمیشہ اپنے آپ کو بلند کرنے سے ملتا ہے نہ کہ نعرے اور جھنڈے کو بلند کرنے سے۔
دوسروں کو اپنی بربادی کا ذمہ دار ٹھہرانا صرف اس بات کا ثبوت ہے کہ آدمی خود اپنے امکانات سے با خبر نہ ہوسکا۔
ہر شام کے بعد دوبارہ نئی صبح آتی ہے مگر صبح کو پانے والا صرف وہ شخص ہے جو صبح کے آنے تک اس کا انتظار کرے۔
جو شخص کاٹھ کی ہنڈیا میں کھانا پکائے اس کے لیے یہی مقدر ہے کہ وہ ہمیشہ بھوکا پڑا رہے۔
اپنی ہار کو ماننا اس عزم کا اظہار ہے کہ آدمی پھر سے محنت کر کے اپنی کھوئی ہوئی بازی کو دوبارہ جیتنا چاہتا ہے۔
محرومی آپ کے لیے ترقی کا زینہ ہے، اگر وہ آپ کی دبی ہوئی قوتوں کو جگانے والی ثابت ہو۔
طاقتور دشمن سے انصاف کی اپیل کرنا ایسا ہی ہے جیسے پتھر سے یہ کہنا کہ وہ پانی کا چشمہ جاری کردے۔
اگر آپ بولنا نہیں جانتے تو چپ رہنا جانیے کیوں کہ چپ رہنا بھی اتنا ہی بڑا کام ہے جتنا کہ بولنا۔
برے سلوک کا بہترین جواب اچھا سلوک ہے، جہالت کا بہترین حل اس کو نظر انداز کر دینا ہے۔
