mearaj-e-safar

barrāq-e-fikr hai gardūñ-navard aaj kī raat

havā uḌtī hai tāroñ kī gird aaj kī raat

ye kaun zehn ke raushan makān meñ utrā

ḳhayāl-e-sūrat-e-jibrīl dhyān meñ utrā

hai ḳham rasā.ī-e-insāñ pe fāsloñ kī jabīñ

bulandiyoñ pe kamandeñ uchhāltī hai zamīñ

ye raat kyuuñ na ho afzal tamām rātoñ meñ

liye hue haiñ añdhere charāġh hāthoñ meñ

vo raat jis kā zamāna javāb lā na sake

milā.e aañkh to sūraj bhī taab lā na sake

vo raat jis ne hasīñ ḳhvāb jaag kar dekhā

vo raat jis ne mohammad ko arsh par dekhā

gayā thā ishq ḳhalāoñ kī raah se aage

nigāh jaatī hai hadd-e-nigāh se aage

rukī rukī nazar aatī thī nabz aalam kī

guzar rahī thī savārī rasūl-e-akram kī

ravāñ the saath farishte abā uThā.e hue

fazā.eñ katba-e-salle-alā uThā.e hue

urūj-e-ādamiyat aap par tamām huā

ḳhudā ḳhud apne hī jalvoñ se ham-kalām huā

tajalliyāt ke haale meñ yuuñ ghire donoñ

kamān-e-vasl khiñchī mil ga.e sire donoñ

buland aise na rutbe kisī nabī ke hue

zahe-nasīb ki ham ummatī usī ke hue

barraq-e-fikr hai gardun-naward aaj ki raat

hawa uDti hai taron ki gird aaj ki raat

ye kaun zehn ke raushan makan mein utra

KHayal-e-surat-e-jibril dhyan mein utra

hai KHam rasai-e-insan pe faslon ki jabin

bulandiyon pe kamanden uchhaalti hai zamin

ye raat kyun na ho afzal tamam raaton mein

liye hue hain andhere charagh hathon mein

wo raat jis ka zamana jawab la na sake

milae aankh to suraj bhi tab la na sake

wo raat jis ne hasin KHwab jag kar dekha

wo raat jis ne mohammad ko arsh par dekha

gaya tha ishq KHalaon ki rah se aage

nigah jati hai hadd-e-nigah se aage

ruki ruki nazar aati thi nabz aalam ki

guzar rahi thi sawari rasul-e-akram ki

rawan the sath farishte aba uThae hue

fazaen katba-e-salle-ala uThae hue

uruj-e-adamiyat aap par tamam hua

KHuda KHud apne hi jalwon se ham-kalam hua

tajalliyat ke haale mein yun ghire donon

kaman-e-wasl khinchi mil gae sire donon

buland aise na rutbe kisi nabi ke hue

zahe-nasib ki hum ummati usi ke hue