lahu ki dhaar

ḳhuun ke chhīñTe jo dekhe vaqt ke kirdār par

zindagī chaltī nazar aa.ī mujhe talvār par

zehn ke sahrā meñ gahrī soch ke ḳheme lage

lashkar-e-taḳh.īl ke chāroñ-taraf pahre lage

lauh kā siina huā chhalnī qalam ke tiir se

naza.a kā aalam jhalaktā hai rag-e-tahrīr se

aag barsī hai ġhamoñ kī zindagī ke khet par

lauTte haiñ phir mire jazbāt jaltī ret par

karb se lau de uThā sho.ala mire ehsās kā

phuuT niklā mere hoñToñ se samundar pyaas kā

chal diyā sū-e-furāt āñkhoñ kā mashkīza liye

lauT aayā rāste se zaḳhm kī iizā liye

ik qayāmat sī bapā hai karbalā-e-zāt meñ

lāsha-e-sibt-e-nabī hai āñsuoñ ke haat meñ

ai husain ibn-e-alī ai turra-o-dastār-e-dīñ

terī buniyādoñ pe hai Thahrī huī dīvār-e-dīñ

nabz-e-qānūn-e-ḳhudā dhaḌkī tire īsār se

tū ne bātil kī rageñ kāTīñ lahū kī dhaar se

ilm vāloñ ko shahādat kā sabaq tū ne diyā

mar ke bhī zinda rahe insāñ ye haq tū ne diyā

qil.a-e-islām kā mazbūt darvāza hai tū

suukh jaa.eñ vaqt kī shāḳheñ tar-o-tāza hai tū

tere ghoḌe ke sumoñ kī ḳhaak mil jaaye agar

maiñ gulāboñ kī tarah chun luuñ sar-e-shāḳh-e-nazar

KHun ke chhinTe jo dekhe waqt ke kirdar par

zindagi chalti nazar aai mujhe talwar par

zehn ke sahra mein gahri soch ke KHeme lage

lashkar-e-taKHil ke chaaron-taraf pahre lage

lauh ka sina hua chhalni qalam ke tir se

naza ka aalam jhalakta hai rag-e-tahrir se

aag barsi hai ghamon ki zindagi ke khet par

lauTte hain phir mere jazbaat jalti ret par

karb se lau de uTha shoala mere ehsas ka

phuT nikla mere honTon se samundar pyas ka

chal diya su-e-furaat aankhon ka mashkiza liye

lauT aaya raste se zaKHm ki iza liye

ek qayamat si bapa hai karbala-e-zat mein

lasha-e-sibt-e-nabi hai aansuon ke hat mein

ai husain ibn-e-ali ai turra-o-dastar-e-din

teri buniyaadon pe hai Thahri hui diwar-e-din

nabz-e-qanun-e-KHuda dhaDki tere isar se

tu ne baatil ki ragen kaTin lahu ki dhaar se

ilm walon ko shahadat ka sabaq tu ne diya

mar ke bhi zinda rahe insan ye haq tu ne diya

qila-e-islam ka mazbut darwaza hai tu

sukh jaen waqt ki shaKHen tar-o-taza hai tu

tere ghoDe ke sumon ki KHak mil jaye agar

main gulabon ki tarah chun lun sar-e-shaKH-e-nazar