اللہ تیرا شکر ادا ہو نہیں سکتا

اللہ تیرا شکر ادا ہو نہیں سکتا

گو بندۂ نا چیز سے کیا ہو نہیں سکتا

حل عقدۂ باقی و فنا ہو نہیں سکتا

میں مل نہیں سکتا ہوں جدا ہو نہیں سکتا

کیا بندے سے ہو سکتا ہے کیا ہو نہیں سکتا

جو بندہ ہے بندہ ہے خدا ہو نہیں سکتا

توفیق مجھے طاعت خالص کی عطا کر

مجھ سے عمل زہد و ریا ہو نہیں سکتا

موقوف نہیں طور پہ کچھ تیری تجلی

کس چیز میں تو جلوہ نما ہو نہیں سکتا

کام آئے مرا سر رہ تسلیم و رضا میں

یہ کام بھی بے تیری رضا ہو نہیں سکتا

قابلؔ نہ چرا جان حزیں اس کی ادا سے

واللہ کہ رد حکم قضا ہو نہیں سکتا