تیری کرتے ہیں بڑائی خالق کون و مکاں

تیری کرتے ہیں بڑائی خالق کون و مکاں

ہم سبھوں کا تو ہے والی خالق کون و مکاں

ہو رہی ہے آشکارا تیری ہر تخلیق سے

تیری قدرت کی نشانی خالق کون و مکاں

ہم بھی دیکھیں چشم تر سے ایک دن تیرا حرم

ہے یہی حسرت ہماری خالق کون و مکاں

کرتا ہوں ہر کام کا آغاز تیرے نام سے

ملتی ہے پھر کامیابی خالق کون و مکاں

ہے ترے ہی قبضۂ قدرت میں دنیا کا نظام

تو نے ہی دنیا بنائی خالق کون و مکاں

زندگانی بخش کر، بخشا ہمارے واسطے

تو نے دانہ اور پانی خالق کون و مکاں

ہے تجھی سے کوک کوئل کی، گلستاں میں بہار

اور دریا میں روانی خالق کون و مکاں

تاب وہ ہم میں نہیں ہم کر نہیں سکتے بیاں

شان تیری ہے نرالی خالق کون و مکاں

حیطۂ رحمت میں رکھنا اپنے نازاںؔ کو سدا

ہے یہی اس کی دہائی خالق کون و مکاں