نیر_عرفاں ہے وصف شان_شیخ_العارفیں

نیر عرفاں ہے وصف شان شیخ العارفیں

مشرق ایماں رخ تابان شیخ العارفیں

کب کوئی توصیف ہے شایان شیخ العارفیں

نطق سے بالا ہے شرح شان شیخ العارفیں

دونوں عالم ہو گئے قربان شیخ العارفیں

مرحبا حسن رخ تابان شیخ العارفیں

اپنے لطف خاص سے حق نے وہ دل بخشا مجھے

جاگزیں جس دل میں ہے ارمان شیخ العارفیں

دیدۂ پر شوق محو آرزوئے شوق دید

دل اسیر کاکل پیچان شیخ العارفیں

ہمسر اوج فلک یا ہمسر عرش علا

کیا کہوں میں رفعت ایوان شیخ العارفیں

باعث برکت بنا ہے بہر لطف ایزدی

ابر رحمت گوشۂ دامان شیخ العارفیں

حق سے پاتے ہیں حقیقت میں حیات سرمدی

کشتگان خنجر مژگان شیخ العارفیں

میں ہوں قاتلؔ نغمہ سنج گلستان منقبت

کہتے ہیں سب طوطی بستان شیخ العارفیں