بسر ہو زندگی عزت میں تیری چاہے ذلت میں

بسر ہو زندگی عزت میں تیری چاہے ذلت میں

ترے قبضے میں بندے کچھ نہیں ہے دست قدرت میں

خدا بھی چاہتا ہے اور محبت کا تقاضا ہے

ہماری زندگی گزرے فقط آقا کی مدحت میں

نبیٔ پاک کی عظمت پہ کیوں انگلی اٹھاتا ہے

اگر ہو دیکھنا عظمت تو آ شہر محبت میں

جہاں کو چھان کر روح الامیں کہتے ہیں آقا سے

نہیں ہے آپ کے جیسا کوئی بھی ساری خلقت میں

غلام مصطفیٰ کو غم ہو کیوں محشر کا اے لوگو

وکالت رحمت عالم کی ہوگی اس عدالت میں

کہیں ہم بھی اگر سرکار لطف خاص ہو جائے

کبھی جائیں گے ہم بھی سرور عالم کی خدمت میں

مرے آقا اگر چشم عنایت آپ فرما دیں

خدا بھی بخش دے گا اور ہم جائیں گے جنت میں

مرا دعویٰ ہے بعد از انبیا ساری خدائی میں

نہیں ہے حضرت صدیق اکبر سا صداقت میں

یہی کہہ کر تسلی دیتے ہیں دل کو اویس عنبرؔ

مدینہ ہم بھی جائیں گے اگر لکھا ہے قسمت میں