کی جس نے آپ کی مدحت سرائی فاطمہ زہرا

کی جس نے آپ کی مدحت سرائی فاطمہ زہرا

یقینا اس پہ ہے فضل الہی فاطمہ زہرا

نہیں ہے دوجہاں میں جن کا ثانی فاطمہ زہرا

وہ بابا آپ کا ہے اور امی فاطمہ زہرا

دل و جاں کو نچھاور کیوں نہ آخر ہم کریں ان پر

رسول اللہ کی بیٹی ہیں پیاری فاطمہ زہرا

کلام پاک میں جو آیت تطہیر پڑھتے ہیں

ہے اس میں نیک خصلت آپ کی بی فاطمہ زہرا

اسے خلد بریں کی بو ملے یہ غیر ممکن ہے

کرے گا تجھ سے جو بھی بے وفائی فاطمہ زہرا

ہمارا خالی کاسہ بھر دو بابا جان کے صدقے

تمہارے در پہ آئے ہیں سوالی فاطمہ زہرا

خدائے پاک نے خلد بریں سے کھانا بھیجا تھا

دعا کچھ اس طرح ہے رنگ لائی فاطمہ زہرا

ندا آئے گی محشر میں نگاہیں نیچی کر لو اب

نبئ پاک کی گزرے گی بیٹی فاطمہ زہرا

بہت ہی مفلس و مجبور ہے یہ عنبرؔ خستہ

کریں اب اس کی بھی مشکل کشائی فاطمہ زہرا