مرحبا رحمت ہی رحمت نور والا آ گیا

مرحبا رحمت ہی رحمت نور والا آ گیا

لے کے گلزار ہدایت نور والا آ گیا

جو ہوا جلوہ فگن ماہ ربیع النور میں

بانٹنے وہ عشق و الفت نور والا آ گیا

ظلم ڈھا سکتا نہیں اب کوئی بھی مظلوم پر

سر سے پا تک بن کے رحمت نور والا آ گیا

عاصیو! خوشیاں مناؤ جھوم جاؤ وجد میں

کرنے ہم سب کی شفاعت نور والا آ گیا

ہوتے ہی آمد شہنشاہ جہاں کی دہر میں

ہو گئی کافور ظلمت، نور والا آ گیا

اے حلیمہ سعدیہ تیرے مقدر کو سلام

مل گئی تجھ کو فضیلت نور والا آ گیا

جس نے بھی دیکھا پکار اٹھا مچل کر دفعتاً

خوب سیرت خوب صورت نور والا آ گیا

دفن ہو سکتی نہیں اب بیٹیاں زندہ کبھی

کرنے مظلوموں کی حمایت نور والا آ گیا

غم کے مارو بے سہارو خوب تم خوشیاں مناؤ

دور کرنے رنج و کلفت نور والا آ گیا

حملہ ور ایوان باطل پر ہوا یوں زلزلہ

کفر پر چھائی تھی ہیبت نور والا آ گیا

خوش نصیبی ہے ہماری ہم ہیں عبد مصطفیٰ

لے کے بخشش کی ضمانت نور والا آ گیا

عنبرؔ خستہ ہی کیا سارا جہاں کہتا ہے یہ

بے کسوں پر کرنے شفقت نور والا آ گیا