جی میں ہے نعتِ نبی میں مطلعِ رنگیں لکھوں

جی میں ہے نعتِ نبی میں مطلعِ رنگیں لکھوں

منتظر ہیں دیر سے مشتاق ہیں اہلِ سخن

بول بالا ہے ترا دنیا میں اے شاہ وزمن

باتیں کرتا ہے ترے منھ سے خدائے ذوالمنن

آدمی تو کیا فرشتوں پر بھی تجھ کو فوق ہے

مہبطِ روح الامیں ہے تیرا گھر تیرا وطن

غیب کے اسرار اکثر تجھ پر افشاں ہوگئے

کھل گئے دل پر ترے رازِ حقیقت من و عن

اللہ اللہ وہ شریعت تیری وہ تیری کتاب

ہو گئے منسوخ سارے جس سے ادیانِ کہن

کر دیا اس سمت سے اس سمت تک سب کو نہال

جب پڑی دنیا پہ تیری ابرِ رحمت کی بھرن

برسوں کے ڈوبے ہوئے تونے نکالے آن میں

صدیوں کے بگڑے ہوئے تونے سنبھالے دفعتاً

خانۂ کعبہ سے بت تیرے نکلوائے ہوئے

تیرے للکارے ہوئے تر سا و گبر و برہمن

تیرے تابع جملہ انعام و نباتات و حجر

ترے زیرِ حکم سب پیر و جواں و مرد و زن

تیرے در کی خاک کے ذروں سے بھی کم قدر ہیں

مشتری و زہرہ و مریخ و پروین و پرن

تیرے ٹھکرائے ہوئے تختِ شہنشاہانِ دہر

تیرے پھنکوائے ہوئے تاجِ گہرہائے عدن

آ کے سیکھی دشمنوں نے بھی ترے مستوں کی چال

ساری دنیا میں ہوا رائج ترے گھر کا چلن

تاجدارِ شش جہت روحِ روانِ چار یار

شمع ایوانِ رسالت صدرِ بزمِ پنجتن

چارہ ساز و درد منداں حامیٔ بیچارگاں

شافع روزِ قیامت دافع رنج و محن

بادشاۂ انس و جاں حاجت روائے بیکساں

قبلۂ اہلِ زماں و کعبۂ اہلِ زمن

مدح گیسو لکھنے بیٹھوں تو لکھوں تا صبحِ حشر

یا رب اتنی طول ہو میری شبِ فکرِ سخن

تو کہاں اور مدحِ ممدوح و حبیبِ حق کہاں

ہوش میں آ عیشؔ آنکھیں کھول دیوانہ نہ بن

ہاں قصیدہ اب دعا پر ختم کرنا چاہیے

لوگ گھبرا جائیں گے موزوں نہیں طولِ سخن