تماشا تو اہلِ نظر دیکھتے ہیں

تماشا تو اہلِ نظر دیکھتے ہیں

تجھے دیکھتے ہیں جدھر دیکھتے ہیں

نہیں دیکھتا جن غریبوں کو کوئی

انہیں شاہِ جن و بشر دیکھتے ہیں

گری ٹوٹ کر ہم پہ رحمت خدا کی

جو دیکھا کہ حضرت ادھر دیکھتے ہیں

نہ چھیڑو ہمیں حشر میں اے ملائک

وہ دیکھو شہِ بحر و بر دیکھتے ہیں

یہ آتا ہے جی میں کہ پتھر سے پھوڑیں

جدا تیرے در سے جو سر دیکھتے ہیں

وہ روشن ہیں نقشِ کفِ پا کہ جس کو

تعجب سے شمس و قمر دیکھتے ہیں

بس اے عیشؔ اب بزمِ مولود میں چل

تری راہ اہلِ ہنر دیکھتے ہیں