محمدؐ کے جو کوچہ میں گزر ہوتا تو کیا ہوتا

محمدؐ کے جو کوچہ میں گزر ہوتا تو کیا ہوتا

مدینہ میں اگر میرا بھی گھر ہوتا تو کیا ہوتا

شفیع المذنبیں میرا محمدؐ سید الکونین

اسی دنیا میں گر سب کا حشر ہوتا تو کیا ہوتا

ترے ناز و ادا رفتار کے قربان اے پیارے

میرا وہ نازنیں نازک کمر ہوتا تو کیا ہوتا

دکھا میں چاند رجب کا تو یاد آیا مجھے مصحف

جمال روئے مصحف گر قمر ہوتا تو کیا ہوتا

غرض دیدار یار اپنا نہ مسجد ہے نہ مے خانہ

طرف دیوار مسجد کے جو در ہوتا تو کیا ہوتا

سخن شیریں مثل طوطی کے ہے گفتار سب تیری

اگر وہ یوسف مصری سکر ہوتا تو کیا ہوتا

تصدق اب کروں میں لعل سیمیں کو ترے لب پر

در دنداں اگر تیرا گہر ہوتا تو کیا ہوتا

ہوا میں مضمحل ایسا نمک جیسا کہ پانی میں

نماز عشق میں ظہر و عصر ہوتا تو کیا ہوتا

غروب شمس ہوا جس وقت نمود ہوئی شام غم اس وقت

اگر اس وقت پر شیخ عصر ہوتا تو کیا ہوتا

محبت کے ہیں کیا آثار کبھی ہنسنا کبھی رونا

محو گریہ ہو ہنسنے میں ضرر ہوتا تو کیا ہوتا

سن تیرہ سو چودہ تھا سن ہجری کا اے محمودؔ

ربیع الاول میں اپنا بھی سفر ہوتا تو کیا ہوتا