خواجۂ_خانون_قطب_دو_جہاں

خواجۂ خانون قطب دو جہاں

جانشین والیٔ ہندوستاں

ہے سعید الدین چشتی نام پاک

مرتبہ شاہ ولایت بے گماں

تھا وطن ناگور پیدائش کا سال

آٹھ سو ترپن ہجری ہے بیاں

صبح صادق دو جمادی اولیں

آپ نے پائی بقائے جاوداں

خاص حرماں فقرۂ تاریخ ہے

نو صد و چالیس ہجری بے گماں

یک ہزار و آٹھ ہجری میں بنا

روضۂ عالی ہے یہ جنت نشاں

کتبۂ درگاہ میں لکھا ہے صاف

آپ ہیں مشکل کشائے انس و جاں

حضرت خواجہ معین الدین نے

آپ کو بخشا ہے تاج کن فکاں

ناظم قانون باطن آپ ہیں

فیض بخش وعارفین و کاملاں

با لیقیں پاتا ہے وہ اپنی مراد

آئے جو چالیس دن دل سے یہاں

پنج شنبہ کے بھی سارے زائرین

پاتے ہیں مقصود و فیض بے کراں

پس دعا کرتے ہیں وقت روشنی

جانشین و زائرین و خادماں

بہر انوار خدا و مصطفیٰ

کلمہ توحید ہو ورد زباں

آل واصحاب والی کا واسطہ

ہوں وسیلہ حشر تک کل خواجگاں

جملہ اسلاف و خلف کی نسبتیں

تا ابد دل میں رہیں جلوہ فشاں

جو یہاں موجود یہں یا دور ہیں

حال دل ہیں آپ پر سب کے عیاں

سب کی پوری ہوں مرادات دلی

اور رہیں محفوظ کل وابستگاں

برکتیں حاصل ہوں رزق عمر میں

زیست کا ہر سانس گزرے شادماں

دین و دنیا کے سبھی بن جائیں کام

ہر جگہ قائم رہے امن و اماں

تا ابد سرسبز ہو باغ حمید

پھولتے پھلتے رہیں سجادگاں

مثل مہر و ماہ بخشے روشنی

حشر تک یا رب چراغ چشتیاں

طالب چشم عنایت ہے حضورؐ

دل شکستہ اک گدائے آستاں

مرتے دم تک آپ کا ناظرؔ فقیر

آپ کے در پر رہے سجدہ کناں

الٰہی تا بود خورشید و ماہی

چراغ چشتیاں را روشنائی