مست ہیں طالب_دیدار رسول_عربی

مست ہیں طالب دیدار رسول عربی

دیکھ کر گرمئ بازار رسول عربی

دست و چشم و نگہ و شوق ترا کیا کہنا

لوٹ لی دولت دیدار رسول عربی

چشم واللیل میں مازاغ کا سرمہ ہے دیا

مرحبا گیسوئے خم دار رسول عربی

سر جھکاتے ہیں ملائک بھی برائے تسلیم

دیکھ کر شوکت دیدار رسول عربی

موت کو اپنی شب و روز طلب کرتے ہیں

اے زہے لذت آزار رسول عربی

کیوں براق اس کو نہیں صاحب دانش سمجھے

برق بر دوش ہے رہوار رسول عربی

نشۂ بادۂ الفت کہ نہ پوچھ ان کے سوا

جو ہیں مست مے اسرار رسول عربی