وہ صبحِ مدینہ وہ شام مدینہ معطر معطر ہوائے مدینہ

وہ صبحِ مدینہ وہ شام مدینہ معطر معطر ہوائے مدینہ

سنہری سنہری حجابوں میں رحمت مقدس مقدس فضائے مدینہ

وہ روضہ کی جالی وہ احساس عظمت وہ بے تابی دل طبیعت پر رِقت

لرزتے ہوئے لب وہ اشک ندامت سکوں بخش آہ و بکائے مدینہ

در و بامِ اقدس یہ نظروں کے سجدے زباں پر وہ صلی علیٰ کے ترانے

درودِ مدینہ سلام مدینہ لب و قلب مدحت سرائے مدینہ

وہ دالاں جو ہے اہل صفہ کا مسکن جو مزدور و محنت کشوں کا تھا مامن

تھے دل جن کے عشق پیمبر سے روشن نثارِ شہہ ِخوش لقائے مدینہ

وه تسبیح و تہلیل و تمجید داور ملائک کو بھی رشک آتا ہے جن پر

محبت کی تنویر سے دل منور فروزاں فروزاں ضیائے مدینہ

شب و روز یادوں کو دیتے ہیں دستک دل و گوش جن سے ہیں مسحور اب تک

اذانِ مدینہ صلواة مدینہ سجودِ مدینہ دعائے مدینہ

خوشا دل کو حاصل ہوئی ہے وہ دولت کہ کونین کی عظمتیں اس کی قیمت

مری زندگانی کی جو ہے حرارت دلائے محمد ولائے مدینہ

یہی دل کی دھڑکن یہی آرزوئیں نمازوں میں شام و سحر یہ دعائیں

کہ پھر آپ کے در پر سر کو جھکائیں ہو خورشید کی جاں فدائے مدینہ