نگاہ_لطف کے سانچے میں ڈھل رہا ہوں میں

نگاہ لطف کے سانچے میں ڈھل رہا ہوں میں

کبھی تھا سنگ مگر اب پگھل رہا ہوں میں

سفینہ ڈوب ہی جاتا غموں کے طوفاں میں

تیرا کرم ہے بھنور سے نکل رہا ہوں میں

یہ خاص وارث عالم کا ہے کرم مجھ پر

رہ گناہ سے اب بچ کے چل رہا ہوں میں

عنایتیں ہیں تمہاری مرا مقدر ہے

پکڑ کے دامن اقدس مچل رہا ہوں میں

نہ جانے کون سے پتھر سے جاکے ٹکراتا

نوازشوں سے تیری اب سنبھل رہا ہوں میں

گمان گزرتا ہے یا واقعی صداقت ہے

اب ان کے نقش قدم پر ہی چل رہا ہوں میں

ہجوم غم میں بھی کاملؔ کو اضطراب نہیں

ہے سامنے رخ زیبا بہل رہا ہوں میں