مجبور ہوں لاچار ہوں اے جان تمنا

مجبور ہوں لاچار ہوں اے جان تمنا

میں جینے سے بیزار ہوں اے جان تمنا

مدت ہوئی میں نے جو تجھے دیکھا نہیں ہے

میں تشنۂ دیدار ہوں اے جان تمنا

آنکھوں میں بٹھاؤں کہ کلیجے سے لگاؤں

میں تیرا پرستار ہوں اے جان تمنا

مجھ مجرم الفت کو جو چاہو وہ سزا دو

میں حاضر دربار ہوں اے جان تمنا

دنیا میں حسیں ایک سے ہے ایک حسیں تر

میں تیرا طلب گار ہوں اے جان تمنا

نادار ہوں مفلس ہوں مگر جان بھی دے کر

میں تیرا خریدار ہوں اے جان تمنا

مشتاقؔ سے مت پوچھ سیہ چشم کی تاثیر

میں مست ہوں سرشار ہوں اے جان تمنا