کیا گلہ کرے کوئی خوب یہ زمانہ ہے

کیا گلہ کرے کوئی خوب یہ زمانہ ہے

دوستی کے پردے میں تیغ قاتلانہ ہے

یہ کہاں کی الفت ہے یہ کہاں کی باتیں ہیں

پیار جس کو کہتے ہیں صرف اک فسانہ ہے

بجلیوں کی یورش ہے دور تک نشیمن سے

روشنی کے سائے میں میرا آشیانہ ہے

آپ میری بانہوں میں اس طرح سے آ جاؤ

یہ جبیں سمجھ جائے جیسے آستانہ ہے

حسن کی یہ تابانی صرف چند روزہ ہے

عشق اک حقیقت ہے باقی سب فسانہ ہے

ایک سمت ہے کعبہ ایک سمت بت خانہ

یہ بتائیے طالبؔ سر کہاں جھکانا ہے