rafta-rafta ye jahan bilkul fana ho jaega

rafta-rafta ye jahāñ bilkul fanā ho jā.egā

ek din ābād sab mulk-e-baqā ho jā.egā

laḳht-e-dil nūr-e-nazar koī nahīñ āvegā kaam

paar jab hulqūm ke tīr-e-qazā ho jā.egā

gul-sā ruḳh nargis-sī āñkheñ ḳhaak meñ mil jā.eñgī

jab zamīn-e-qabr par bistar tirā ho jā.egā

lag gayā jis dam tamāñcha maut kā ai pahlavān

dast-o-pā har ek phir tan se judā ho jā.egā

jiite jī ke yaar haiñ ye sab ’azīz-o-aqribā

gor meñ rakh kar tujhe har ik judā ho jā.egā

haath ḳhālī jā.egā is 'ālam-e-fānī se tū

'umr kā labrez jab pyāla tirā ho jā.egā

'umr-e-do-roza ye kyuuñ phirtā hai bhūlā ai 'valī'

dekh lenā ek din tū bhī fanā ho jā.egā

rafta-rafta ye jahan bilkul fana ho jaega

ek din aabaad sab mulk-e-baqa ho jaega

laKHt-e-dil nur-e-nazar koi nahin aawega kaam

par jab hulqum ke tir-e-qaza ho jaega

gul-sa ruKH nargis-si aankhen KHak mein mil jaengi

jab zamin-e-qabr par bistar tera ho jaega

lag gaya jis dam tamancha maut ka ai pahlawan

dast-o-pa har ek phir tan se juda ho jaega

jite ji ke yar hain ye sab ’aziz-o-aqriba

gor mein rakh kar tujhe har ek juda ho jaega

hath KHali jaega is 'alam-e-fani se tu

'umr ka labrez jab pyala tera ho jaega

'umr-e-do-roza ye kyun phirta hai bhula ai 'wali'

dekh lena ek din tu bhi fana ho jaega