اس قدر چمکا جمال یار رسوا ہو گیا

اس قدر چمکا جمال یار رسوا ہو گیا

ان کا ماہ و مہر ہو جانا تماشا ہو گیا

کوئی دیکھے اس سراپا حسن کی رعنائیاں

آئینہ محو جمال روئے زیبا ہو گیا

یہ عروج شان غم تھا یا کرامت عشق کی

دامن دل میں جو آنسو تھا وہ تارا ہو گیا

ہو تمہیں مقصود دنیا ہو تمہیں مقصود دیں

دین و دنیا سب اسی کے جو تمہارا ہو گیا

خیر آئی تو اجل کوئی ملا تو غم گسار

ڈوبتے کو ایک تنکے کا سہارا ہو گیا

اس قدر ہے دل فریبی ہر ادا میں آپ کی

خود مصور دیکھ کر تصویر شیدا ہو گیا