نہ قعود میں نہ سجود میں نہ رکوع میں نہ نماز میں

نہ قعود میں نہ سجود میں نہ رکوع میں نہ نماز میں

تیری بندگی جو ادا ہوئی تو قیام عجز و نیاز میں

نہ فنا کی منزل راز میں نہ بقا کی راہ دراز میں

اگر عشق تیرا مقام ہے تو دلوں کے سوز و گداز میں

مئے بیخودی نے دکھا دیا جو چھپا تھا پردۂ راز میں

کہ بھری ہیں ساری حقیقتیں فقط ایک جام مجاز میں

یہ نئی ہے رسم و رہ رضا ہے عجیب عشق کا ضابطہ

اسی سر کو تن سے کریں جدا جو جھکا ہو راه نیاز میں

مرا اب تو قابلؔ بے نوا یہ طریق عشق میں حال ہے

کبھی اک قدم ہے نشیب میں کبھی اک قدم ہے فراز میں