تو کبھی جھوٹی قسم کھاتا نہیں

تو کبھی جھوٹی قسم کھاتا نہیں

سچ ہے تو اغیار میں جاتا نہیں

تجھ سے تو بہتر تصور ہے ترا

یہ شبِ غم پاس سے جاتا نہیں

پڑھتے پڑھتے خط کو حرفِ وصل پر

بولے اب آگے پڑھا جاتا نہیں

کیوں مسیحائے زمانہ بن گیے

جو علاجِ دردِ دل آتا نہیں

میں وفا کر کے پشیماں ہو گیا

تو جفا کر کے بھی شرماتا نہیں

کہتے کہتے رک گیے کیا بات ہے

کیا ہے دل میں لب پہ جو آتا نہیں

بندہ پرور رحم کے لائق ہے عیشؔ

رحم اس پر کیوں تمہیں آتا نہیں