تم ہی سے رونق ہے میکدے کی تمہیں سے آباد بزم مستاں

تم ہی سے رونق ہے میکدے کی تمہیں سے آباد بزم مستاں

تمہارے دم سے ہے رنگ گلشن تمہیں گلستاں تمہیں بہاراں

وہ چہرہ گویا کھلا گلستاں وہ قد رعنا ہے سرو بستاں

نظر کی گردش ہے دل کی قاتل لبوں کی شوخی مسیح دوراں

یہ کون آیا ہے میکدے میں نصیب تشنہ لبوں کے جاگے

اٹھائی ساقی نے چشم میگوں برس رہی ہے شراب عرفاں

رشیدؔ کیسے کھلے حقیقت خرد پریشاں ہے عقل ہے گم

وہی مؤخر وہی مقدم وہی ہے ظاہر وہی ہے پنہاں