نہ سمجھ میں آئے لیکن یہ خطا نہیں بیاں کی

نہ سمجھ میں آئے لیکن یہ خطا نہیں بیاں کی

وہ قفس کی کیسے ہوتی جو زباں تھی آشیاں کی

جو نکل کے دل سے لب تک بھی بہ مشکل آ سکی تھی

ہوئی عرش تک رسائی اسی آہ ناتواں کی

میں چمن سے دور ہوکے کوئی غیر ہو گیا ہوں

کہ چھپائے مجھ سے باتیں کوئی میرے آشیاں کی

ہوئی سارے قافلوں کی وہی رہنمائے منزل

جو فضا میں گرد باقی تھی ہمارے کارواں کی

اسے یاد کیسے رہتی رہ و رسم باریابی

جسے ہوش نہ ہو سر کا نہ خبر ہو آستاں کی