کون ہے وہ جو تجھے دیکھ کے حیراں نہ ہوا

کون ہے وہ جو تجھے دیکھ کے حیراں نہ ہوا

چاک داماں نہ ہوا چاک گریباں نہ ہوا

میرے نالوں میں وہ گرمی تھی کہ پتھر پگھلے

نرم لیکن کسی صورت دلِ جاناں نہ ہوا

کس قدر شاق تھا اس جانِ گلستاں کا فراق

میرے دل پر اثرِ فصلِ بہاراں نہ ہوا

رات کیا کیا نہ بہے اشک مری آنکھوں سے

وہ مگر اپنی جفاؤں پہ پشیماں نہ ہوا

دو رخی عشق میں خسرو نے مٹا دی یکسر

کوئی محرومِ یقیں صاحبِ ایماں نہ ہوا