کم نہیں ہوتی ہے الفت کی جلن پانی میں

کم نہیں ہوتی ہے الفت کی جلن پانی میں

لگ کے پھر بجھتی نہیں ہے یہ اگن پانی میں

کیا سمجھتے ہو تم آساں ہے محبت کرنا

غرق کر دیتی ہے چاہت کی لگن پانی میں

حکم پاتے ہی نکل آتی ہے ڈوبی کشتی

ہے حکومت تیری آئے غوث زمن پانی میں

پل میں ہی ڈوب گیا وہ جو خدا بنتا تھا

کام آیا نہ کوئی اس کا جتن پانی میں

مچھلیاں رقص کرے وجد میں آئے موجیں

رکھ دے اپنے جو قدم شاہ زمن پانی میں

ذکر یزداں کے بنا پاک نہیں ہوتا دل

لاکھ دھو کے ڈبو دو یہ بدن پانی میں

ہے یہ درویشؔ کا اماں جو محمدؐ چاہے

مچھلیاں دشت میں پیدا ہو ہرن پانی میں