جلوہ روئے نبی نور بصر ہو جائے

جلوہ روئے نبی نور بصر ہو جائے

مردم دیدۂ ارباب نظر ہو جائے

اک ذرا تیری توجہ جو ادھر ہو جائے

دل صنم خانہ ہے اللہ کا گھر ہو جائے

رات دن برق سر طور کا جلوہ دیکھوں

میری جانب نظر لطف اگر ہو جائے

در پہ رکھتا ہوں ترے کاش تری ٹھوکر سے

سرفراز آج مرا کاسۂ سر ہو جائے

تیرے بیمار یہی کرتے ہیں ہر صبح دعا

آج کچھ اور فزوں درد جگر ہو جائے

حسرت دید نے دم روک لیا آنکھوں میں

تم جو آؤ تو آہنگ سفر ہو جائے

جس طرف لے کے چلیں لوگ جنازہ میرا

کاش تیرا بھی اسی سمت گزر ہو جائے

ان کی تعریف میں جو شعر کہوں میں فضلیؔ

گوش والا کے قریں جائے گہر ہو جائے