dil ko anwar-e-mohammad se farozan kar len

dil ko anvār-e-mohammad se farozāñ kar leñ

sho.ala-e-tūr charāġh-e-tah-e-dāmāñ kar leñ

hasb-e-irshād-e-nabī kar ke jihād-e-akbar

pahle apne dil-e-kāfir ko musalmāñ kar leñ

phir uTheñ ho ke ham āmāda-e-har karb-o-balā

sar-ba-sar pairvī-e-shāh-e-shahīdāñ kar leñ

dar-e-jānāñ pe guzar apnā jab hī mumkin hai

'ishq se 'ahd kareñ dard se paimāñ kar leñ

ab irāda hai musammam ki kareñ tark-e-vatan

aur maskan ba-sar kūcha-e-jānāñ kar leñ

mash'al-e-rāh-e-'adam chāhiye 'ushshāq ko kyā

dāġh-e-dil apne zarā aur numāyāñ kar leñ

vo jo aate haiñ pareshānoñ kī pursish ke liye

ham zarā aur bhī haal apnā pareshāñ kar leñ

manzil-e-gor kī zulmat ke liye ham 'fazlī'

’aks-e-rukHsār-e-nabī sham’-e-shabistāñ kar leñ

dil ko anwar-e-mohammad se farozan kar len

shoala-e-tur charagh-e-tah-e-daman kar len

hasb-e-irshad-e-nabi kar ke jihad-e-akbar

pahle apne dil-e-kafir ko musalman kar len

phir uThen ho ke hum aamada-e-har karb-o-bala

sar-ba-sar pairwi-e-shah-e-shahidan kar len

dar-e-jaanan pe guzar apna jab hi mumkin hai

'ishq se 'ahd karen dard se paiman kar len

ab irada hai musammam ki karen tark-e-watan

aur maskan ba-sar kucha-e-jaanan kar len

mash'al-e-rah-e-'adam chahiye 'ushshaq ko kya

dagh-e-dil apne zara aur numayan kar len

wo jo aate hain pareshanon ki pursish ke liye

hum zara aur bhi haal apna pareshan kar len

manzil-e-gor ki zulmat ke liye hum 'fazli'

’aks-e-rukHsar-e-nabi sham’-e-shabistan kar len