آپ ہی کا ذکر تو دن رات ہے

آپ ہی کا ذکر تو دن رات ہے

بھول جائیں ہم بھلا یہ بات ہے

محتسب کا خوف تو ہر دم رہا

آج پھر ساغر چلے برسات ہے

تم فدا غیروں پہ ہم تم پر نثار

لو تمہیں منصف ہو کیسی بات ہے

دل کے کھینچنے کی میں کس سے دوں مثال

کہربا کی بھی کشش تو مات ہے

لے لیا بوسہ تو بولے جئیے

میرا صدقہ ہے مری خیرات ہے

دخت رز ہو گھر میں خواہش ہے یہی

مینہ برستا ہے اندھیری رات ہے

دن ہے آخر پاؤں میں چھالے ہیں قیسؔ

دور منزل ہے اندھیری رات ہے