میری دعاوں کا انجام بے اثر نکلا

میری دعاوں کا انجام بے اثر نکلا

تو میرے حال سے اس درجہ بے خبر نکلا

غموں کی بارشیں ہونے لگیں میرے دل پر

تیرے خیال کی سرحد سے میں اگر نکلا

تیری وفاؤں کے قصے کو جب پڑھا میں نے

جسے طویل سمجھتا تھا مختصر نکلا

جو میرے قتل کے ضامن تھے کیا گلا ان سے

یہ تیرا ہاتھ بھی میرے لہو سے تر نکلا

خوشی تو چھوڑ گئ منزلوں سے پہلے ہی

قدم قدم پہ ترا غم ہی ہم سفر نکلا

میں تیرے عشق کے صحرا کی دھوپ میں جھلسا

نہ سائباں نہ کوئی راہ میں شجر نکلا

جہاں پہ چھوٹا لگے حرف بے وفائی بھی

مرے گمان سے اتنا وہ بالاتر نکلا

حویلیاں تو وہم تھیں تیرے تخیل کی

ذرا سی خاک میں شایاںؔ تیرا گھر نکلا